لا حس سامعين لا خبر .. نوم العوافى *
نوم العوافي يا ملك .. نوم العوافي *
يا قدس مش قلت لك .. دا الهمة مافي *
********************************
دا الأمير بيبصلك ..
يمكن يجيلك جري حافي *
ويزعل اللي يزعلك ..
ويروق الجو ييبقي صافي*
********************************
نوم العوافي يا عرب .. نوم العوافي *
القدس بدأت تنضرب .. والصمت كافي *
ازاي بنسكت يا عرب .. النخوة ما في ؟ *
فنجانك ازاي ينشرب .. بعد التجافي ؟ *
وطعامك ازاي ينبلع .. والدم صافي *
هو احنا كل ما ننضرب .. نسكت نعافي *
ياقدس ما حد هرب .. غير المخافي *
واحنا خلاصة العرب .. والدرس كافي *
*******************************
غمض عينيك يا ابن البلد عن كل طاغي بيتولد *
واعرف حدودك يا ولد هو انتا مش من البلد *
ازاي يا واد تتهور وترفع راية مش رايتك *
اجري بسرعة يا ولد وبص كتير في مرايتك *
بصيت كتير ولقيتك مخنوق بحبل من مسد *
بص كتير كده لروحك تلقاها كارهة دا الجسد *
بص كمان هتلاقي سواد وجه اللي فسد *
تلقي وشوش خزيانة طمعانة في خير البلد *
تلقي نفوس منفوشة عالفاضي دايما يا ولد *
تلقي قلوب مرضانة بداء الغل والحسد *
تلقي كلام في كلام والفعل زاغ ما اتوجد *
يا صاحبي قوم يرعاك من خلق سماء بلا عمد *
البس هدومك ياولد إنتا اللي خايف عا البلد *
واحمل سلاحك وانتظر لحظة جهاد بنت وولد *
عالقدس رايحين كلنا أحرار كتير من غير عدد *
********************************
الغايب يعلم الحاضر دا كل شئ كان له سبب *
والقدس شوكة ف ضهرهم لسه القرار ما انشطب *
********************************
سمعني صوتك وانتفض وريني حبك للبلد *
وعلي صوتك وانتقم من كل فار عامل أسد *
يا ( تور ..امب ) دي قدسنا حد ليك فيها اتولد ؟ *
ولا انتا عامل لي بطل علي ناس بقي كمالة عدد *
ارحل بسرعة وريحنا من عقلك دا اللي فسد *
واهتم بأحوال شعبك واترك بلادنا واتخمد *
ليه غاوي تعكر مزاجنا وتعيشنا في النكد *
القدس دايما عربية كفاية قر بقي وحسد *
الدم سال علي أرضها ارحل بقي كفاية عقد *
والشهدا دول منها والباقي كله ركع سجد *
الأقصي يصرخ يتألم من جفاء اللي بعد *
وكل حاكم ما سمع كأن في ودانه سدد *
تصاريح هنا تصاريح هناك شوف قالوا إيه يولد *
قضية مين يا جدع خلونا نعيش أيام رغد *
لا قدس عاد يهمنا ولا مين صلي أو سجد *
دا كلام عجيب والله ما تطلبوش منه المدد *
هوا انتم كنتم دافعتم عن بيته لما اترصد *
كلامكم كله عا الفاضي والشعب ثار واحتشد *
دم الشهيد غسل عاركم ولا لسه فيه أمد *
هتاخدوا امتي قراركم ولا انتو عايزين السند *
فين الرجولة يا جدع فين الشهامة يا ولد *
القدس ضاعت مننا وحكامنا أصابهم رمد *
يا صاحبي سيبك منهم وخلي بالك عا البلد *
واقطع رجاءك منهم دا انتا الشجاع اللي اتولد *
دي القدس روحنا وحلمنا وكلنا صبر وجلد *
ما يهمناش تعذيبهم ولا جسمنا اللي انجلد *
احنا اللي شايلين همها واحنا اللي طالبين المدد *
واحنا اللي عارفين طبعها يحميها ربي م الحسد *
حالفين نكمل مشوارنا دا صبرنا خلاص نفد *
وربنا هو المعين وبكرة النصر هيتوجد *
